Dagaal xalay ka dhacay degaanka Cadaada ee Gobolka Bay

Baydhabo:-Waxaa xalay ka dhacay degaanka Cadaada oo u dhexeeya degmada  Awdiile  iyo Berdaale ee Gobolka Bay  iska horimaad hubaysan  oo u dhexeeya ciidanka ururka Al-shabaab iyo ciidanka Dowllada Federaalka Soomaaliya. Dagaalka ayaa la sheegayaa in uu qarxay ka dib markii ciidamo ka tirsan kuwa Dowllada Federaalka Soomaaliya ay weerareen degaanka Cadaada oo ay ku sugnaayeen ciidamo ka tirsan ururka Al-shabaab.

Dagaalka xalay ayaa waxaa ka dhashay dhimasho iyo dhaawac soo kala gaaray 2-da dhinac balse Sarkaal u hadlay ciidanka Dowllada Federaalka Soomaaliya ayaa sheegtay in ay degaanka la wareegeen ciidankoodu wax khasaaro weyna aysan soo gaarin ciidan kooda. Guddoomiyaha  degmada Berdaale ee Dowllada Federaalka Somaaliya oo isagana ay saxaafadu la xiriirtay ayaa sheegay jiritaanka dagaalkaas waxaana uu sheegay in ciidanka Dowllada Federaalka Soomaaliya ay qabsadeen degaanka Cadaada ee dagaalku ka dhacay.

Dhinaca kale ma jiro ilaa hadda wax war ah oo ka soo baxay Masuuliyiinta Al-shabaab ee Gobolka Bay oo ku saabsan dagaalka xalay ka dhacay degaanka Cadaada  iyo wax ka jira in ciidankooda laga qabsaday degaankaas iyo guulaha ay sheegteen ciidanka dowllada Federaalka Soomaaliya oo ee Gobolka Bay oo ay kaabayaan ciidanka Itoobiya iyo kuwa dalka Kenya.

A/cawaale
Halgan.net