Ciidanka DFS oo bilaabay Howlgalo lagu sugayo amaanka magaalada Muqdisho

Muqdisho:-Wararka naga soo gaaraya magaalada Muqdisho ayaa sheegaya in saaka ay ka socdaan baaritaano lagu sugayo amaanka Degmooyinka magaalada Muqdisho waxaana howlgalada lagu qabtay boqolaal qof.

Ciidanka DFS ayaa saaka waxay galeen qaar ka mid ah degmooyinka magaalada Muqdisho waxaana ay guri guri u galeen xaafadaha qaarkood gaar ahaan  Degmada Dharkenley Ee Gobolka Banaadir.

Saraakiisha ciidanka DFS ayaa waxaa ay ugu magac dareen howlgalada ay wadaan “Nabad ku Afur”waxaana dadkii ay howlgalada ku qabteen ku xireen saldhigyada magaalada Muqdisho.

Sarkaal u hadlay ciidanka DFS ayaa sheegay in ay baaritaano ku wadaan dadkii ay qabqabteen isaga oo sheegay in la kala saari doono oo cidii aan danbi lahayn ay sii deyn doonaan.

Howlgalada ay ciidanka DFS ka bilaabeen qaar ka mid Degmooyinka magaalada Muqdisho ayaa ku soo aaday xili ay hanjabaadyo direen kooxda Al-Shabaab iayaga oo sheegay in ay kordhin doonaan qaraxyada iyo dilalka ay ka geystaan magaalada Muqdisho.

Waalidiinta dhalinyarada lagu qabtay howlgalada ay wadaan ciidanka DFS ayaa walaac ka muujiyey in ciidanka DFS aysan kala saarin xubnaha ka tirsan Al-Shabaab iyo dhalinyarada aan wax lug ah ku lahayn dhibka ay geystaan kooxda Al-Shabaab.

A/Cawale
Halgan.net