Madaxweynaha Puntland oo Garoowe kusoo dhaweeyey Madaxweynihii hore ee Soomaaliya Xassan Sheekh Maxamuud.

Garoowe:-Madaxweynaha Dawladda Puntland Mudane Siciid Cabdullaahi Deni ayaa maanta oo ay taariikhdu tahay 25 Jan 2019 wuxuu kusoo dhaweeyey magaalada Garoowe, Madaxweynihii hore ee Soomaaliya ahna Mudane ka tirsan Baarlamaanka Federaalka Mudane Xassan Sheekh Maxamuud iyo wafdi uu hofaaminayo oo lagu casumay Xafladda Caleema-Saarka Madaxda cusub ee dawladda Puntland.

Soo dhaweynta Madaxweynihii hore ee Soomaaliya waxaa ku wehelinayey Madaxweynaha Dowladda Puntland, Madaxweyne Ku-xigeenka Puntland, Guddoonka Baarlamaanka Puntland, masuuliyiin ka tirsan Geleyaasha dowladda Puntland, saraakiil ka tirsan Madaxtooyada Puntland, siyaasiyiin, nabadoono iyo masuuliyiin kale.

Madaxweyne Deni ayaa uga mahadceliyey Madaxweynihii hore kasoo qeybgalay Caleema Saarka Madaxda dawladda, waxaana uu sheegay in ay shacabka iyo dawladda Puntland u tahay guul wanaagsan.

Dhinaca kale Madaxweynihii hore ee Soomaaliya Xassan Shiikh Maxamuud ayaa ka mahadceliyey soo dhaweynta Madaxweynaha iyo dawladdiisa, wuxuu sheegay in uu kufaraxsan yahay imaanshihiisa Puntland, isla’markaana bogaadiyey doorashadii Taariikhiga ahayd ee ka qabsoontay Puntland, taas oo Caalamka oo dhan tustay dawladnimada iyo biseylka siyaasadeed ee Puntland.

Sidoo kale Madaxweynihii hore ee Soomaaliya ahna Xildhibaan ka tirsan baarlamaanka Soonaaliya ayaa ka qeybgalaya Caleema-Saarka Madaxweynaha dawladda Puntland Mudane Siciid Cabdullaahi Deni iyo K-xigeenkiisa oo habeen dambe ku qabsoomaysa Qasriga Madaxtooyada Puntland ee Garoowe.

Madaxweynaha Dowladda Puntland, Madaxweyne Ku-xigeenka Puntland iyo masuuliyiinta Goleyaasha dowladda Puntland ayaa soo dhoweeyey wufuud ka socda dawladda Fadaraalka Soomaaliya.

no images were found

=DHAMMAAD=
XAFIISKA WARFAAFINTA, WACYI-GELINTA HIDDAHA IYO DHAQANKA EE MADAXTOOYADA DOWLADDA PUNTLAND