Taliyaha Qeybta Booliska Gobalka Bari oo kormeer kadis ah ku tegay xarumaha ay ka mid yihin Saldhigyada Booliska[Video]

Boosaaso:- Taliyaha Qeybta Booliska Gobalka Bari G/Sare Xuseen Cali Maxamuud ayaa kormeer shaqo oo kadis ah ku tagay Xarumaha saldhigyada iyo qeybo ka mid ah Wadooyinka Magaalada Bosaaso halkaas oo ay ku sugan yihiin ciidamo ka tirsan Booliska Gobalka Bari kuwaas oo ku jira sugida amniga shacabka madaama magalada ay u soo baxayaan dadweyne badan oo gadanaya dharka ciidda Waxaana halkaas uu warbixin kaga dhegeystay Taliyaasha iyo sida ay amniga u sugayaan.

Sidoo kale Taliye Xuseen ayaa bogaadiyey howlaha kala duwan ee ka socda goobaha uu caawa kormeerka shaqo ku tegay, waxaana uu ciidamada kula dardaarmay iney sii laban laabaan howlaha muhiimka ah ee ay u hayaan Bulshada ku nool Gobalka Bari.

Taliyaha Qeybta Booliska Gobalka Bari G/Sare Xuseen Cali Maxamuud waxa uu sheegay inuu jiri doono Isla xisaabtan dhab ah oo lagu abaal marin doono cid walba oo shaqo wanaagsan u heysa Bulshada uu madaxda u yahay, waxa uuna taas bedelkeeda intaa ku daray iney ciqaab muteysan doonaan cid walba oo ku guul dareysata howsha loo idmaday.

Ugu danbeyn Taliyaha ayaa kormeero kedis ah ku tagay qaar kamid ah saldhigyada Bosaaso si uu u hubiyo shaqooyinka ka socda waxaana uu warbixn ka dhegeestay Taliyaha saldhiga oo ka waramay maxaabiista ugu jirta saldhiga iyo danbiyada ay ku xiran yihiin.

Halgan.net