Faah-faahin Dagaal ka dhacay Degmada Buulo-burde ee Gobolka Hiiraan

Buulo-burte:-Wararka ka imaanaya degmada Buulo-burte ee gobolka Hiiraan ayaa sheegaya in iska horimaad uu dhexmaray ciidamada DFS kuwa AMISOM oo isku dhinac ah iyo Al-Shabaab waxaana uu iska horimaadku bilaawday ka dib markii askar ka tirsan Al-Shabaab ay weerartay Hoteelka Camaloow Degmada Buulo-burte .

Iska horimaadka ayaa waxaa ku dhintay ilaa 6 qof oo ay labo ka mid ah yihiin ciidamada AMISOM ee dalka Jabuuti .Guddoomiyaha degmada Buulo-burte ee gobolka Hiiraan Axmed Cabdullaahi waaweyne oo la hadlay warbaahinta waxaana uu sheegay in labo nin oo ka tirsan Al-shabaab ay saaka weerar ku qaadeen Hoteelka Camaloow Buulo-burde iyaga oo rabay in ay is qarxiyaan balse la toogtay.

Guddoomiyaha degmada Buulo-burte ee gobolka Hiiraan Axmed Cabdullaahi ayaa xaqiijiyey in laba ka mid ah ciidanka Jabuuti la dilay halka Al-shabaab ay ka dileen laba askari.Xaalada degmada Buulo-burte ee gobolka Hiiraan ayaa saaka degan.

Dhanka kale Afhayeenka howlgalada Al-Shabaab C/casiis Abu Muscab oo warbaahinta la hadlay ayaa sheegay in ay weeerar culus ku qaadeen Hoteelka Camaloow ee degmada Buulo-burte ee gobolka Hiiraan ayna weerarka ku dileen saraakiil Jabuutiyaan ah.

A/Cawale
Halgan.net