Madaxweynaha Puntland oo Garoowe xariga ka jaray labo wado oo laami ah.(Masawiro)

Garoowe:-Madaxweynaha Dawladda Puntland Dr.Cabdiweli Maxamed Cali Gaas ayaa maanta oo ay taariikhdu tahay 10-3-2015 si rasmi ah xariga uga jaray labo Wado oo laami ah oo laga hirgeliyey Magaalada Garoowe ee caasimada Dawladda Puntland.

Wadooyinkaa laamiga ah ayaa Madaxweynaha Dawladda Puntland Dr.Cabdiweli Maxamed Cali Gaas waxaa uu dhagax dhigay bartamihi sanadkii tegay ee 2014, waxaana lagu fuliyey mashruuca horumarinta degmooyinka Puntland oo si habsami leh uga soconaya guud ahaan Gobolada Puntland.

Madaxweynaha Dawladda Puntland Dr.Cabdiweli Maxamed Cali Gaas ayaa sheegay in labadaan wado iyo weliba wadooyinka kale ee laamiga ah ay wax badan ka badaleen bilicda caasimada Dawladda Puntland ee Garoowe.

” Waxaan rabnaa in dedaalkeena isugu gayno inaynu bedelno wajiga Puntland ay leedahay, waxaan mar walba xooga saaraynaa baahida muhiimka ah sida wadooyinka, Biyaha iyo kaabayaasha dhaqaalaha Dalkeena in wax badan aanu ka qabano” Ayuu yiri Madaxweyne Gaas.

” Hadaan nabad-gelyo jirin horumar lama gaarayo, horumarkuna waxaa uu ku xiran yahay nabad-gelyada, cidna dawladdu gorgortan kala gelimayso nabadgelyada iyo jiritaanka Puntland ” Ayuu yiri Madaxweyne Gaas.

” Waxaan rajeynayaa in sanadba sanadka ka dambeeya horumarku sii siyaado, wadooyinku noo siisiyaadaan, ceelasha biyuhu sii siyaadaan garoomada diyaaradaha iyo dekeduhu noo sii siyaadaan insha’allah Puntland isbedal dhab ah ayaa ka dhicidoona ”Ayuu hadalka raaciyey Madaxweyne Cabdiweli Gaas.

no images were found

Madaxweynaha Dawladda Puntland Dr.Cabdiweli Gaas ayaa dabayaaqadii sanadkii tegay ee 2014 dhagax dhigay wadadaan, waana wado muhiim u ah isu socodka dadka iyo gaadiidka, waxaana ay wadadaan isku xiraysaa xaafadaha Wadajir, Horseed iyo Waaberi.

-DHAMMAAD-

Xafiiska Warfaafinta, Wacyi-gelinta, Hiddaha Iyo Dhaqanka ee Madaxtooyada Puntland.