Madaxweynaha Dawladda Puntland oo Garoowe kaga qayb galay kulan xogwaraysi ku saabsan dorashada 2016.[Masawiro]

Garoowe:-Madaxweynaha Dawladda Puntland Dr.C/weli Maxamed Cali Gaas ayaa maanta 28-Dec-2015 magaalada Garoowe ee Caasimadda Dawladda Puntland kaga qayb galay kulan is xog waraysi ah oo ku saabsanaa shirarkii looga hadlayey aayaha soomaaliya oo muqdisho kadhacay horaantii bishan kuwaas oo Puntland ay uga qayb galeen Madaxweynaha Dawladda Puntland iyo wafdi ballaadhan oo uu hoggaaminayey.

Kulan ayaa waxaa sidoo kale kasoo qayb galay Madaxweyne ku-xigeenka Dawladda Puntland Eng.C/xakiim Cabdulaahi xaaji Cumar Camey, Wasiiro, Xildhibaano, urarada bulshada rayid ah, aqoonyahan, wax-garad iyo culimaa’udiin.

Madaxweynaha Dawladda Puntland Dr.Cabdiweli Maxamed Cali Gaas ayaa bulshadii kasoo qayb gashay kulanka  uga warbixiyey waxyaabihii ay kala soo kulmeen shirarkii ay xamar kaga qayb galeen isagoona tilmaamay inay madalihii shirarku ka-socdeen ay ka sheegeen aragtida shacabka Puntland ay kaqabaan hannaanka doorashooyinka 2016- taasoo gundhigeedu yahay in deegaan wax lagu soo doorto si loo helo metelaad dhab ah oo shacabka ka timaadda.

Madaxweynaha Dawladda Puntland Puntland ayaa sidoo kale xusay in aragtiyaha shacabka soomaaliyeed ee ku kala dhaqan gobollada dalka badidoodu ay ahayd sidii loo heli laha metelaad dhab ah oo shacabka ka-timaada balse ay jiraan dad siyaasiyiin ah oo dano u gaar ah wata kuwaas oo doonaya inay majara habaabiyaan aragtida suuban ee shacabka soomaaliyeed taasina aanay ahayn mid waqtiga suurtoobi karta.

Waxyaabihii kulanka diiradda lagu saaray ayaa waxaa sidoo kale kamid ah Puntland inay tahay xubin muhim ah lafdhabarna u ah hannaanka federaalka soomaaliya isla mar ahaantaana ay mudan tahay in go’aanadeed iyo talooyinkeedaba la qaato.

Sidoo kale kulanka waxaa laysku weydaarsadey aragtiyo iyo talooyin ku qotoma sidii dalka soomaaliya looga saari lahaa xaaladda cakiran ee kuu kujiro maadaama Puntland marwalba ay iyadu u taagan tahay sidii loo heli laha qaran Soomaaliyeed oo xoogle isla markaasna cagihiisa ku istaaga.

Ugu dambayntii Madaxweynaha Dawladda Puntland kulanka soo geba-gebeeyey ayaa shacabka reer Puntland u ballan qaaday in uu  aragtidooda tixgelin doono  lana wadaagi doono ummadda Soomaliyeed maadaama Dawladda Puntland ay tahay mid kudhisan latashiga shacabkeed.

no images were found

—DHAMMAAD—

XAFIISKA WARFAAFINTA, WACYIGELINTA, HIDDAHA IYO DHAQANKA EE MADAXTOOYADA DAWLADDA PUNTLAND.