Faahfaahin Weerar lagu qaaday Madaxtooyad Maamulka Koonfur-galbeed Soomaaliya.

Baydhabo:-Wararka naga soo gaaraya magaalada Baydhabo ee xarunta gobolka Baay ayaa sheegaya in qaraxyo iyo rasaas laga maqlay afaafka hore ee xarunta madaxtooyada maamulka Koonfur-galbeed Soomaaliya. Wararka ayaa sheegaya in gaari laga soo buuxiyey walxaha qarxa uu ku qarxay afaafka hore ee xarunta madaxtooyada Maamulka Koonfur-galbeed waxaana intaas ka dib xigay rasaas goos goos ah.

Kooxda soo weerartay xarunta madaxtooyada ee Maamulka Koonfur-galbeed Soomaaliya ayaa qaar ka mid ah waxaa u suuro gashay in ay galaan gudaha xarunta.

Warar hordhac ah ayaa sheegaya in 3 askari ay ku dhinteen qaraxii koowaad ee lagu weeraray xarunta Maamulka Koonfur-galbeed Soomaaliya.

Xiliga la weeraray xarunta Maamulka Koonfur-galbeed Soomaaliyaayaa waxaa halkaas ka socday shir ay wada lahaayeen masuuliinta Maamulka Koonfur-galbeed waxaana xarunta ku sugnaa madaxweynaha Maamulka Koonfur-galbeed Shariif Xasan Sh Aadan .

Kooxda Al-Shabaab ayaa sheegatay weerarka lagu qaaday xarunta madaxtooyda ee Maamulka Koonfur-galbeed iyaga oo sheegay in ay dileen askar Itoobiyaan ah.

Dhanka kale Saraakiisha Maamulka Koonfur-galbeed Soomaaliya  ayaa soo baddhigay Ilaa Saddex Ruux oo Meyda oo ay ku sheegtay in ay yihiin kooxdii soo weerartay xarunta madaxtooyada Maamulka Koonfur-galbeed Soomaaliya.

Wararkii ugu danbeeyey ee naga soo gaaraya magaalada Baydhabo ayaa sheegaya in weerarka ay ku dhinteen 3 askari oo ilaalo ka ahayd xaunta waxaana goobta soo gaaray ciidamo ka tirsan DFS iyo kuwa Itoobiya oo ka tirsan AMISOM.

A/Cawale
Halgan.net