Ciidamada DFKM oo howlgallo ka sameeyay Degmada Afgooye

Afgooye:-Ciidamada DFKM ayaa saaka howlgalo balaaran ka sameeyey xaafadaha Degmada Afgooye ee gobalka Shabeelaha Hoose waxaana ay ku soo qabteen dad aad u badan kuwaas oo ay sheegeen saraakiil ka tirsan DFKM in looga shakiyey in ay gacan saar la leeyihiin Ururka Al-Shabaab.

Ciidamada DFKM ayaa bilaabay howlgalada saaka ka dib markii Bam gacmeed lagu weeraray xalay ciidamo ka tirsan Booliska DFKM oo ku sugnaa meel aan sidaa uga fogeyn Saldhiga Degmada Afgooye.

Guddoomiyaha degmada Afgooye ee DFKM C/laahi Cabdi Axmed ayaa waxa uu sheegay in howlgallada ay saaka bilaabeen ciidanka DFKM ay yihiin kuwo lagu sugayo amaanka Degmada Afgooye wuxuuna intaas raaciyey in ay sii socon doonaan .

Dadka ku dhaqan Degmada Afgooye ayaa ka cabanaya amaan daro iyo dhac baahsan ay geysanayaan ciidamada DFKM iyo maleeshiyaad hubeysan oo aan cidna ka amar qaadan.

A/Cawale
Halgan.net