Isbaarooyin la soo dhigay Wadada u dhaxysa Muqdisho iyo Marka

Afgooye:-Wararka naga soo gaaraya Degmada Afgooye ayaa sheegaya in darawalada gawaarida ka dhaqeysa inta u dhaxeysa Muqdisho iyo Marka ay shaqa joojin sameeyeen ka dib markii isbaarooyin badan la soo dhigay wadada u dhaxysa Muqdisho iyo Marka.

Isbaarooyinka ayaa waxaa dhigtay ciidamo ka tirsan DFS iyaga oo gaari walba ka qaadaya 200,000 oo shilin Soomaali ah waxaana ay dhibaato ku hayaan shacabkii u kala gooshi jiray Muqdisho iyo Marka.

Maamulka gobalka Shabeelaha Hoose ayaa sheegay in ay dhowr mar ashtako gaarsiiyeen wasaarada arimaha gudaha iyo wasaaarada G/dhiga ee DFS si wax looga qabto Jid gooyooyinka la soo dhigay wadada u dhaxysa Muqdisho iyo Marka balse aan ilaa haatan aan wax laga qaban.

Wararkii iugu danbeeyey ayaa sheegaya in ciidamo ka tirsan AMISOM iyo kuwa DFS ay ku guuleysteen in galinkii danbe ee maanta ay qaadeen 10 Isbaaro waxaana warbaahinta u xaqiijiyey Gudoomiyaha gobolka Shabeelaha Hoose Cabduqaadir Maxamed Nuur.

Cabdi Yare
Halgan.net