Makka maxaan ku soo arkay? W/Q Sh Axmed Cabdisamad

Dad xoolohooda janno ku doonaya oo la taagan waddooyinka xujeydu marayaan cunto, biyo iyo cabbitaano kale. Waddada isku xirta Jidda iyo madiina, tan u dhexaysa Makka iyo Madiina iyo mida xiriirisa Jidda iyo Makka intaba waxaa ku yaal xarumo la joojiyo gawaarida xujeyda sida; si loogu qaybiyo cuntooyin iyo cabbitaano.Guryaha xujeydu daganyihiin marar badan waxaa la keenaa cunto iyo cabbitaan. Maalmaha xajkana dhinacyada waddooyinka waxaa yaal gawaari waaweyn oo sida cuntooyin ama cabbitaano xujeyda loo qaybinayo. Gawaaridaas iyo martisoorkaas waxaa keena dad kala duwan, sida madaxda dowladda, maalqabeenada waaweyn, jamciyado samafal iyo dad waxa yar ee ay heli karaan janno ku doonaya oo xoogaagooda midba meel la istaagayo ama ku qaybninayo.Waxaan arkay meel nin xaafad madax ka ah uu xujeyda biyo qabow ugu qaybinayo. Waxaan arkay gawaari cunto qaybinaysa oo waalidkii loo bixinayo. Waxaa kaa yaabinaya gaar ahaan habeenka Muzdalifa dad xujeyda soo baryaya oo doonaya inay cuntada ka qaataan. Nabigeenu scw markuu Madiina yimid wuxuu yiri: “Dadow salaanta faafiya, cuntadana bixiya, qaraabadana xiriiri yam habeenkiina tukada dadkoo hurda, jannada aad nabadgalyo ku gasheene.”Waxaan aad ugu farxay sida dadkaani madax iyo majo, qani iyo faqiir ay xadiiskaan ugu dadaalayaan. Horeyna waxaan u soo qoray askartu sida ay ugu dadaalayso khidmada xujeyda ilaa ay la gaartay inay biyo qabow ku firdhiyaan xujeyda ag maraysa; si ay u qaboojiyaan. Waa arrin mudan in aynu walaaleheen kaga dayano.