Taliye cusub oo loo magacaabay Garoonka diyaaradaha ee Boosaaso

Boosaaso:-Taliyaha Ciidanka Booliska dowladda Puntland Col.C/risaaq Afguduud ayaa waxaa uu saaka u magacaabay Taliyaha ciidanka ilaalada garoonka diyaaradaha ee Boosaaso waxaana uu xilkaas u magacaabay Gaashaanle Aadan Muuse Jaamac magacaabista Taliyaha cusub ee Garoonka Boosaaso ayaa yimid ka dib markii askari ka tirsanaa ciidanka ilaalada Garoonka diyaaradaha Boosaaso uu dilay Allaha u naxariistee Taliyihii hore ee Garoonka diyaaradaha Boosaaso Xassan Shire Amaan.

Askarigii dilay Allaha u naxariistee Taliyihii hore ee garoonka diyaaradaha Boosaaso Xassan Shire Amaan ayaa baxsaday balse Taliyaha Ciidanka Booliska dowladda Puntland Col.C/risaaq Afguduud ayaa amray in la xiro ilaaladii Garoonka Boosaaso oo hadda ay ku socoto baaritaan.

Talyaha cusub ee loo magacaabay garoonka diyaaradaha ee Boosaaso Gaashaanle Aadan Muuse Jaamac ayaa ah nin dhalinyaro oo firfircoon waxaan la filayaa in shaqo fiican uu ka qaban doono garoonka Boosaso oo dhismihiisa la soo gabagabayn doono maalmaha soo socda.

M_M_Deeq
Halgan.net