Maamulka Gal-Mudug oo ka hadalay weerarkii Al-shabaab saaka ku soo qaadeen deegaanka Wisil

Gaalkacyo:-Kooxda argagixisada ururka A-lshabaab ayaa saakay aroornimadii hore weerar gaadmo ah ku soo qaaday fariisin ciidamada Daraawiishta Galmudug ay ku lahaayeen magaalada Wisil oo dhacda 60km dhanka Woqooyi ee magaalada Hobyo.

Qorshaha argagixisadu wuxuu ahaa in ay la wareegaan gacan ku haynta Magaalada istiraatiijiga ah ee Wisil, ayna laayaan ciidamadii halkaas ku sugnaa, isla markaana ay qabsadaan gaadiidka iyo hubka saldhigaas yaallay, balse ciidamada geesiyada ah ee Daraawiishta Galmudug oo kaashanaya dadka deegaanka ayaa wax kama jiraan ka dhigay riyadii argagixisada, ayadoo khasaaro xooggan iyo jab weyn uu halkaas ka soo gaaray kooxda argagixisada Al-shabaab ee halkaas soo weerartay, qiyaastiina halkaas looga dilay Kontomeeyo maleeshiyaadkooda ka mid ah.

Waxaa xusid mudan in Dawladda Galmudug ay u dirtay gurmad ciidamo fara badan oo laga soo kala diray magaalooyinka Gaalkacyo, Dhusamareeb, Hobyo iyo deegaamo kale oo gaaray nawaaxiga Wisil, kuwaasoo diyaar u ah in ay argagixisada dersi lama ilaawaan u dhigaan maalmaha soo socda.

Dawladda Galmudug waxay tacsi u diraysaa ehelada shuhadadii ku shahiiday weerarkii argagixisada ee Wisil ee isugu jiray ciidamo iyo shacab, ayadoo aan u rajaynayno dhaawacyada caafimaad degdeg ah.

—-DHAMAAD—