Shirka London oo maanta furmaya iyo Madaxweyne Xasan Sheekh Maxamuud oo ku sugan London

London:-Madaxweynaha DFS Xasan Sheekh Maxamuud iyo wafdi uu hogaaminayo ayaa gaaray magaalada London xili la filayo in maanta uu ka furmo magaalada London ee xarunta dalka Britain Shirweyne caalami ah oo looga hadlayo arrimaha Soomaaliya waxaana shir-guddoomin doonaan shirkan dowladaha Soomaaliya iyo Britain.

Madaxweynaha DFS Xasan Sheekh Maxamuud iyo wafdi balaaran oo uu hogaaminayo ayaa shalay lagu soo dhaweeyey magaalada London waxaana ku soo dhaweeeyey garoonka diyaaradaha saraakiil ka tirsan wasaarada arimaha dibada ee dalka Britain.

Shirweynaha caalami ah ee ka furmaya maanta London ayaa looga hadli doonaa  arrimaha Soomaaliya iyada oo diirada lagu saari doonaa  in laga taageero DFS arimaha  dib-u-dhisidda ciidamada gaar ahaan kuwa melatariga  , booliska, ilaalada xeebaha, nidaamka garsoorka, maareynta hantida dadweynaha iyo ilaalinta xuquuqda aadanaha .

Shirka ayaa sidoo kale waxaa shaqaale loogu uruurin doonaa ciidamada Midowga Afrika ee AMISOM kuwaas oo taageero melatari u fidiya DFS, waxaa kale oo shirka looga doodi doonaa howlgalka cusub ee Qaramada Midoobay UNSOM iyo arimaha qoxootiga Soomaaliyeed ee ku nool dalalka dariska la ah Soomaaliya sida Kenya ,Itoobiya ,Jabuuti,iyo Yemen.

Shirkan ayaa ah kii Labaad ee lagu qabto dalka  Britain gaar ahaan magaalada London waxaana qaadacay shirka in ay ka qeyb galaan Maamulka S/land iyo Puntland iyaga oo ku dooday in aanay la socon ajandaha shirka London ,waxaan sidoo kale aan shirka tagin Maamulka Galmudug .

CabdiFitaax Cali Cismaan
London