Guddoomiyaha Ceel-Cadde ee Gobolka Gedo oo la Dhaawacay.[Dhagayso]

Kismaayo:-Guddoomiyaha Degamada Ceel-Cadde ee Gobolka Gedo Cabdi Cali Cabdi Qoorleex ayaa ku dhaawacmay qarax lala eegtay gaari uu saaraa oo marayay meel ku dhow deegaanka Likooleey. Gudoomiyaha ayaa la socday ciidamada Kenya ee shalay ka guuray saldhigoodii Ceel-Cade ee dhawaan ay ku weerareen maleeshiyada Al-Shabaab.

Axmed Buulle Maxamed oo ah guddoomiyaha maamulka gobolka Gedo ayaa Idaacadda VOA u xaqiijiyey in guddoomiyaha Ceel-Cadde uu labada lug ka dhaawac may. Ciidamada Kenya ee guddoomiyaha uu la socday ayaa waxaa sidoo kale lagu qaaday dagaal jidgal ah oo ay maleeshiyada Al-Shabaab ay ku lug lahaayeen, xilli ay marayaan deegaanka Likooleey oo 40 KM u jira deegaanka Ceel-Cadde. Dhinaca kale, ciidamadii shalay dagaal xooggan la galay maleeshiyada Al-Shabaab oo jidka u galay ayaa maanta gaaray deegaanka Dhamase.

Hoos ka Dhagayso warbixinta Guddoomiyaha Ceel-Cadde oo la dhaawacay waxaa Kismaayo ka  soo diray Khadar Maxamuud Xareed.

Source:VOA