Ciidamo ka tirsan DFS iyo kuwa AMISOM oo howlgalo ka sameeyey Degmada Wadajir

Muqdisho:-Ciidamo ka tirsan DFS iyo kuwa Amisom ayaa saaka howlgallo culus iyo baaritaanno ka wada qaar ka mid ah Degmooyinka gobalka Banaadir gaar ahaan  degmada Wadajir waxaana  howlgalladaas lagu soo qabtay dadweyne gaaraya ilaa 400  oo qof.

Howlgalladan ay ka wadaan magaalada Muqdisho ciidamada DFS iyo kuwa AMISOM ayaa waxay qeyb ka yihiin howlgalo lagu sugayo amaanka magaalada Muqdisho sida ay warbaahinta u sheegeen saraakiil ka tirsan ciidanka DFS iyo kuwa AMISOM.

Ciidamada DFS iyo Kuwa AMISOM ayaa waxay howlgalada ugu culus ka sameeyeen saaka xaafadaha Nasteexo, Jayga iyo siligga Mareykanka, iyagoo guri guri u galay waxayna ka xeysteen ragga da’ kasta oo ay yihiin taas oo ay cabasho ka muujiyeen dadweynaha ku dhaqan xaafadaha ay howlgalada ka socdaan.

Raisulwasaaraha DFS Cabdi Faarax Shirdoon Saacid ayaa horay u sheegay in magaalada Muqdisho ay ka bilaaban doonaan howlgalo lagu baarayo guri kasta si loo xaqiijiyo amaanka magaalada Muqdisho.

A/Cawale

Halgan.net