Wafdi ka socda IGAD oo saaka gaaray magaalada Kismaayo

Kismaayo:-Waxaa saaka soo gaaray magaalada Kismaayo ee xarunta gobalka J/hoose gudigii  xaqiiqa raadinta IGAD waxaana uu kulamo kala duwan la qaadan doonaa Madaxweynaha Juba Land Sheekh Ahmed Madoobe.

Gudiga xaqiiqo raadinta ee Ururka IGAD ayaa  laba maalmood waxaa ay ku sugnaayeen magaalada Muqdisho iyaga oo kulamo la qaatay Madaxweynaha DFS Xasan Sheekh Maxmuud iyo Raisulwasaare Saacid .

Wafdiga Ururka IGAD ayaa waxaa garoonka Diyaaradaha ee magaalada Kismaayo ku soo dhaweeyey Madaxweynaha Juba Land Ahmed Madoobe iyo masuuliin kale .

Waxaa haatan ka socda magaalada Kismaayo ee xarunta gobalka J/hoose kulan u dhexeeya wafdiga ka socda IGAD iyo Madaxweynaha Juba Land iyo Ku xigeenkiisa waxaan ay ka wada hadli doonaan xaalada gobalada Jubooyinka iyo Gedo.

Wafdiga ka socda IGAD ayaa kormeer ku tagay xarunta Jaamacada Kismaayo halkaas oo uu ka socday shirweynihii lagu soo doortay madaxada Juba Land .Wafdiga ayaa la kulmi doona odayaasha dhaqanka iyo qeybaha kala duwan ee Bulshada

Wafdiga ka socda IGAD ayaa laba maalmood ku sugnaan doona magaalada Kismaayo si ay u qiimeeyaan shirweynihii ka dhacay magaalada Kismaayo.

Cabdi Yare
Kismaayo