Ciidamada DFS iyo kuwa AMISOM oo la wareegay degmada Ceelbuur

Ceelbuur:- Ciidanada DFS iyo kuwa Itoobiya ee dhawaan ku biiray AMISOM ayaa la wareegeen gacan ku heynta degmada Ceelbuur ee Gobolka Galgaduud ka dib dagaal culus oo ka dhacay duleedka Ceelbuur waxaana ay ciidamada huwanta ay haatan difaacyo ka sameysteen duleedka Degmada Ceelbuur .

Ciidamada DFS iyo Kuwa AMISOM oo wata gawaari badan oo dagaal ayaa haatan gaafwareegaya gudaha magaalada Ceelbuur waxaana jira khasaaro badan oo gaaray guryaha qaarkiis ka dib markii ay ciidamada DFS iyo kuwa Itoobiya ay Madaafiic ay ku duqeeyeen Degmada Ceelbuur.

War Qoraal ah oo la soo dhigay barta Facebook ay ku leeyihiin ciidamada Midowga Afrika ee AMISOM ayaa waxaa lagu sheegay in ciidamada DFS iyo kuwa AMISOM ay la wareegeen degmada Ceelbuur ee Gobolka Galgaduud.

Ciidamada Al-Shabaab ayaa weeraro kala duwan oo dhaba gal ah u dhigay ciidamada huwanta ee ku soo siqayey degmada Ceelbuur ee Gobolka Galgaduud si ay u hakiyaan ciidamada huwanta waxaana jira khasaaro kala duwan oo gaaray ciidamada huwanta iyo Al-Shabaab.

Isgaarsiinta degmada Ceelbuur ee Gobolka Galgaduud ayaa hawada ka maqan waxaana ciidamada Itoobiya iyo kuwa DFS ay fariisimo ka sameysteen gudaha magaalada Ceelbuur iyo duleedkeeda.

Degmada Ceelbuur oo 375 km dhinaca waqooyi ka xigta magaalada Muqdisho waxaana ay ahayd xarunta ugu weyn ee Al-Shabaab kaga sugnaayeen gobalka Galgaduud.

Guddoomiye ku-xigeenka gobolka Galgaduud Cabdixakiin Cabdullaahi oo la hadlay warbaahinta ayaa sheegay in ciidanka DFS iyo kuwa AMISOM ay ku sugan yihiin Degmada Ceelbuur wuxuuna sheegay in ay baaritaano ka wadaan wuxuuna ka codsaday DFS in ay soo gaarsiiyey Degmada gargaar bini,aadanimo.

A/Cawale
Halgan.net