Odayaal gaaraya ilaa 7 oo shalay lagu dilay duleedka degmada Buurhakaba

Baydhabo:-Waxaa shalay koox hubeysan ay ku dileen duleedka degmada Buurhakaba ee Gobolka Bay ilaa 7 odayaal dhaqan oo ka yimid Baydhabo una socday magaalada Muqdisho Kooxda dishay odayaashaan ayaa waxaa la sheegayaa in ay kala soo dageen gaarigii ay saar naayeen ka dibna ay laayeen.

Wararka ayaa sheegay in Odyaashaan dhaqanka lagu dilay deegaanka Jameecada, oo u dhow degmada Buurhakabo ee Gobalka Bay, meydka odayaasha ayaa isla xalay waxaa la geeyey Degmada Buurhakabo iyadoo maamulka degmada Buurhakaba ay sheegeen in ay baarayaan falkaan foosha xun ee lagu laayey odayaasha cid ka danbaysay.

Taliyaha Booliiska gobolka Bay Col. Mahad C/raxmaan Aadan oo la hadlay saxaafadda ayaa waxaa uu sheegay in dilka odayaashaan dhaqanka ay ka dambeyso ururka Al-shabaab ayna ciidanka Dowladda Federaalka Soomaaliya ay talaabo jawaab ah qaadi doonaan.

Dhinac kale warbaahinta taageerta Al-shabaab ayaa waxaa ay qoreen in Sarkaal u hadlay ururka Al-shabaab oo aan magaciisa la xusin uu sheegay in aysan Al-shabaab wax lug ah ku lahayn odayaasha dhaqanka ee lagu laayey shalay deegaanka Jameecada ee Degmada Buurhakabo ee Gobalka Bay.

A/cawaale
Halgan.net