Saraakiisha ciidanka DFS ee gobalka Hiiraan oo sheegay in ay ku wajahan yihiin Jalalaqsi iyo Maxaas

Buulo-burte:-Saraakiisha ciidanka DFS ee gobalka Hiiraan ayaa sheegay in ay ku wajahan yihiin Degmooyinka Maxaas iyo Jalalaqsi halkaas oo ay gacanta ku hayaan kooxda Al-Shabaab ee shalay laga soo saaray Degmada Buulo-burte ee gobalka Hiiraan.

Gaanshaanle Sare C/laahi Bare oo ka mid ah saraakiisha horkacaysa duulaanka ka dhanka ah Al-Shabaab ee ka socda gobalka Hiiraan ayaa sheegay in ay si degdeg ah ku gaari doonaan Degmooyinka ka tirsan gobalka Hiiraan oo ay wili gacanta ku hayaan Al-Shabaab wuxuuna si gaar ah u xusay degmooyinka Jalalaqsi Maxaas

Ciidamada DFS iyo kuwa AMISOM ayaa shalay waxay la wareegeen gacan ku heynta Degmada Buulo-burte waxaana saaka iyo xalay ay howlgalo baaritaan ah ka sameeyeen qeybo ka mid ah xaafadaha Degmada Buulo-burte.
Dhanka kale Ergayga Midowga Afrika ee arrimaha Soomaaliya , Danjire Maxamed Saalax Anaadiif ayaa soo dhaweeyey guulaha ay gaareen ciidanka DFS iyo kuwa AMISOM isaga oo qabsashada degmada Buulo-burte ku tilmaamay guul weyn.

Danjire Maxamed Saalax Anaadiif ayaa sheegay in ciidamada AMISOM iyo kuwa DFS ay haatan gacanta ku hayaan ilaa lix degmo oo kala ah : Buulo-burte, Waajid, Xudur, Buur-dhuubo, Rab-dhuurre iyo Teed.

A/Cawale
Halgan.net