Ciidamada Puntland oo howl gal ciidan ku qabtay Maxaabiis ka baxsaday Xabsiga Boosaaso

Boosaaso:-Wararka naga soo gaaray magaalada Boosaaso ee xarunta Gobolka Bari ayaa sheegay in saaka ilaa galabta uu dagaal ku dhexmaray Togga Gaaca Ciidamo ka tirsan Puntland iyo kooxdii Al-shabaab ee xalay soo weerartay Xabsiga weyn ee Boosaaso.

Saraakiisha Ciidamada Puntland ee hogaaminaya howl galka socda ayaa u sheegay Warbaahinta in ay qabteen qaar ka mid ah kooxdii Al-shabaab ee xalay soo weerartay Xabsiga weyn ee Boosaaso ayna mar dhow la wadaagi doonta xogta dhabta ah walow weli howlgalku yahay gabagabo.

Warar kale duwan ayaa ka soo baxay maxaabiista ay qabteen Ciidamada PSF,PMPF iyo kuwa Daraawiishta mana jirto weli tiro rasmi ah oo ay saraakisha ciidamadu la wadaageen saxaafadda ilaa hadda balse warar hoose oo aan helnay ayaa sheegay in Ciidanka Amniga Puntland ayaa soo gabagabeeyay howlgal ay ku baacsanayeen Kooxdii soo weerartay Xabsiga Boosaaso, Ciidanku waxay dib u soo qabteen Maxaabiis Al-shabaab iyo Daacish ahaa oo Xabsiga ka baxsaday oo ka badan ilaa 25 iyagoona dilay 20 kale.

Warar kale oo aan ka helnay ilo lagu kalsoon yahay ayaa noo xaqiijiyey in ciidamo kale duwan oo ka tirsan kuwa Puntland ay ka yimaadeen magaalada Qardho iyo Garoowe isla saakana ay qayb ka noqdeen howl galka ay ciidamadu ka wadaan Buuraha ku xeeran Boosaaso.

M_M_Deeq
Halgan.net