Wafdi uu hogaaminayo Madaxweyne ku-xigeenka Dowladda Puntland oo gaaray Saax-meygaag.

Garoowe:-Madaxweyne ku-xigeenka Dowladda Puntland, Mudane Axmed Cilmi Cismaan Karaash iyo wefdi uu hoggaaminayo ayaa galabta gaaray deegaannada Sange-jebiye iyo Saax-meygaag. Ujeedada safarka Madaxweyne ku-xigeenka iyo weftigiisa ayaa salka ku haysa sidii xal nabadeed oo waara looga gaari lahaa dirir soo noq-noqotay oo deegaamadaas ku dhexmartay laba beelood oo walaala ah.

Madaxweyne ku-xigeenka waxa deegaanka Sange-jebiye kusoo dhoweeyey qayb ka mida Isimada Puntland ee ku hawlan dhex-dhexaadinta beelaha walaalaha ah.

Madaxweyne ku-xigeenka Puntland Mudane Axmed Cilmi Cismaan Karaash oo la hadlay Odeyaasha iyo dadka deegaanka ayaa u sheegay inaanu ka tegi doonin deegaanka illaa xal waara laga gaarayo, maadaama ay dirirtu soo noq-noqotay, sidoo kale aan la aqbali karin in dagaal kasii socdo Saax-maygaag iyo Sange Jebiye Dowladduna ay qaadan doonto doorkeeda kama dambaysta ah ee lagu raadinayo nabadda iyo xasiloonida deegaanka.

Ugu dambayn Madaxweyne ku-xigeenka iyo wafdigiisa ayaa caawa ku hoyday deegaanka Saax-maygaag.

no images were found

—DHAMMAAD —-
XAFIISKA WARFAAFINTA MADAXTOOYADA DOWLADDA PUNTLAND