Ciidamada DFS iyo kuwa AMISOM oo la wareegay degmada Qoryooley ee Gobalka Sh Hoose

Afgooye:-Ciidamada DFS iyo kuwa AMISOM ayaa goor dhow la wareegay degmada Qoryooley ee Gobolka Shabeelaha Hoose, kadib dagaal culus oo halkaas ka dhacay waxaana ciidamada huwanka ay degmada ka soo galeen jihooyin kala duwan.

Wararka ka imaanaya degmada Qoryooley  ayaa sheegaya in Ciidamada huwanta ay dhowr jiho ka galeen degmada Qoryooley, iska horimaad culus ayaa waxaa ay dhex mareen ciidanka DFS ,kuwa AMISOM iyo Al-Shabaab waxaana ka dhashay khasaaro kala duwan

Barta Twitterka ee ciidanka  AMISOM ayaa waxaa la soo dhigay qoraal lagu cadeeyey in in ciidmada AMISOM ay Al-Shabaab ka saareen  degmada Qoryooley oo qiyaastii magaalada Muqdisho u jirta ilaa 120-KM.

Gudoomiyaha Gobolka Shabeelaha Hoose C/qaadir Siidii ayaa warbaahinta u xaqiijiyey  in degmada degmada Qoryooley  ay la wareegeen ciidamada DFS iyo kuwa AMISOM wuxuuna sheegay in xaalku haatan degan yahay.

Saraakiisha hoggaaminaya ciidamada AMISOM ayaa waxay sheegeen inuu maanta gobolka Shabeellaha Hoose si rasmi ah uga billowday howlgal ka dhan ah Al-Shabaab waxayna sheegeen in ay la wareegi doonaan dhamaan deegaanada ay Al-Shabaab ka joogaan Gobolka Shabeelaha Hoose

A/Cawale
Halgan.net