Muqdisho oo 24-kii saac ee la soo dhaafay lagu qabqabtay laba kun oo qof.

Muqdisho:-Ciidanka ammaanka ee DFS, ayaa afar iyo labaatankii saac ee la soo dhaafay magaalada Muqdisho, waxay ka sameeyeen howlgallo balaaran oo dad laba kun oo qof ku dhow ku soo qabqabteen.Degmada Wadajir, ayaa ka mid ahayd meelaha dadka badan laga qabqabtay, waxayna dadka la qabqabtay u badan yihiin dhallinyaro.

Saraakiisha ciidanka, ayaa  sheegay in howlgalladan ay yihiin kuwo lagu sugayo ammaanka caasimadda, isla markaasna ciddii aan wax dambi ah lagu helin la sii deynayo, kuwa nabad galyada wax u dhimayana lagu bartilmaameedsanayo.

Dad badan oo la soo daayo ayaa waxa ciidanka dowladda ku eedeeyaan inaan dadka marka horeba la kala soocin ee la xaab qaado, iyadoo qaarkood ay sheegaan in lacago madax furasho ah laga qaato dadka la qabqabto.

Halgan.net/Somalireal