Madaxweynaha Puntland oo baaq Nabadeed soo jeediyey in lagu dhameeyo xiisada Boosaaso.

Garoowe:-Madaxweynaha Puntland Saciid Calaahi Deni ayaa caawa Jeediyey khudbad taariikhi ah oo aad u dheer waxaana uu si gaara khudbadiisa diirada ku saaray xaalada magaalada Boosaaso ee xarunta gobalka Bari oo ay mudo sadex bari ah uu dagaal ku dhexmarey ciidamada dowlada Puntland iyo kuwa PSF .

Madaxweynaha ayaa ugu baaqay Agaasimihii ciidanka PSF Jen Maxamuud Cismaan Diyaano ee uu madaxweynuhu xilka ka qaaday wuxuu sheegay in isaga iyo aabihiis ay u soo halgameen Puntland iyo amaankeeda.

Madaxweynaha Puntland Siciid Cabdullaahi Deni ayaa mar uu ka hadlayey xaalada magaalada Boosaaso ee xarunta gobalka Bari ayaa ballan-qaaday in aysan ciidanka dowladda xabad dambe ka ridayn Boosaaso, xitaa hadii la soo weeraro .

Madaxweynaha Puntland ayaa waxaa uu ku baaqay  in berri laga bilaabo dib loogu furo dhammaan xarumaha dowladda iyo kuwa gaarka loo leeyahay  loona gargaaro dadka dagaalka uu qaxiyey .

Madaxweynaha Puntland ayaa sheegay in dowladiisa ay aqbaleyso wax walba oo nabad lagu gaari karo wuxuuna sheegay in isimada ,culumada iyo waxgaradka uu u horeeyo Boqor Burhaan ay wadaana nabad iyo xasiloonida Puntland.

Madaxweynaha Puntland wuxuu sheegay in uu xiisadda dowlada iyo  PSF u daynayo isimada iyo waxgaradka ku jira, wixii ay soo saaraana ay la qaadanayso dowladiisa.

Hoos Ka Daawo Khudbadii Madaxweynaha Puntland Saciid Cabdulaahi Deni uu ku baaqay Nabad .

M_M Deeq
Halgan.net