Qarax miino oo saaka ka dhacay Xaafada Garsoor ee magaalada Gaalkacyo

Gaalkacyo:-Ciidanka Booliska ee magaalada gaalkacyo ayaa waxaa saaka ku qaraxday miino ay rabeen in ay ka soo saaraan xaafadda Gar soor ee Waqooyiga magaalada Gaalkacyo ee gobolka Mudug ka dib markii xalay ay toogteen nin dhalinyaro ah oo isagu doonayey in uu aaso miinada.

Ninkaan dhalinyarada ah ee la dilay xalay ayaa waxaa ay ciidanku ku amreen in uu istaago balse waxaa uu isku dayey in uu baxso taas oo sababtay in ciidanku ay toogtaan , goobta nin kaan lagu dilay ayaa saaka waxaa soo gaaray ciidamo ka tirsan Booliska oo iyagu loo soo diray in ay miinada ninka uu waday ay furfuraan.

Ciidanka Boolika oo ku howlanaa in ay saaraan miinada ayaa si lama filaan ah u qaraxday waxaan ku dhintay ilaa 7 qof oo iskugu jira askar iyo dad rayid ah oo ku soo xoomay goobta ay taalay miinadu. Dadka dhintay waxay ahaayeen ilaa 2 Askari oo ka tirsan Ciidanka Booliska  ee magaalada Gaalkacyo.

Xaafadda Garsoor ayaa waxaa saaka ka socda howlgalo ay ciidanka Booliska iyo kuwa daraawiista ka bilaabeen  , howlgalkaas oo la sheegay in lagu raadinayo  dad looga shakisan yahay in ay xiriir la lahaayeen ninka xalay ay dileen ciidanka amaanka ee magaalada Gaalkacyo.

Duqa degmada Gaalkacyo Siciid Cabdi Faarax iyo Taliye kuxigeenka qeybta Booliska gobolka Mudug Maxamed Maxamuud Jaamac” Beergeel”ayaa Shir Jaraa’id ku qabtay magaalada Gaalkacyo iyaga oo ka warbixiyey qaraxii ka dhacay Gaalkacyo .Duqa Degmada Gaalkacyo ayaa sheegay in dhaawac fudud uu soo gaaray isaga iyo taliyaha qeybta booliska Mudug ee maamulka Puntland Jaamac Maxamed Axmed.

M_M_Deeq
Halgan.net