Madaxweyne ku xigenka PL oo baaq nabadeed u diray beelo colaad ku dhexmartay deegaanka Lafa-weyne

Garoowe:-Ku-simaha Madaxweynaha Dowladda Puntland Ahna Madaxweyne Ku-xigeenka Dowladda Puntland,Mudane Axmed Cilmi Cismaan Karaash ayaa baaq nabadeed u diray beelaha walaalaha ah ee dirirtu ku dhexmartay deegaanka Lafa-weyne oo ka tirsan degmada Xudun ee gobolka Sool.

Ku-simaha Madaxweynaha Mudane Axmed Karaash ayaa si adag ugu baaqay in beelaha walaalaha ah ee ku dagaalamaya degaankaasi si shuruud la’aan ah ku joojiyaan dagaalka, waxa uu Madaxweyne Ku-xigeenku sheegay in dagaal wiil aanu ku dhalan ee wiil ku dhinto, hanti ku burburto, xigto iyo xigaalna kala fogayso, Adduun iyo Aakhirona aanay lahayn wax aayatiina.

Ugu dambayn, Madaxweyne Ku-xigeenka Dowladda Puntland, Ahna Ku-simaha Madaxweynaha Mudane Axmed Cilmi Cismaan Karaash ayaa Isimada Puntland uga mahadnaqay dedaalka joogtada ah ee ay ka geysteen nabadaynta gobolka Sool, waxa uu ku booriyey inay qayb lixaadle ka qaataan dejinta colaadda kasoo cusboonaatay deegaanka Lafa-weyne ee hoostaga degmada Xudun ee gobolka Sool.

=DHAMMAAD=
XAFIISKA WARFAAFINTA MADAXTOOYADA DOWLADDA PUNTLAND.