Wararkii u danbeeyey dagaalka ka dhex socda ciidanka Puntland iyo ururka Al-shabaab

Garoowe:-Wararka naga soo gaaraya magaalada Garoowe ayaa sheegaya in Togga Suuj laga saaray ciidankii ururka Al-shabaab waxaana ay haatan la isku hor fadhiyaa Gebiyada u jeeda dhanka Badda ee ku aadan Deeganka Garmaal walow wararku sheegayaan in dhinac walba ay ka hareeraysan yihiin Ciidanka Puntland.

Dadka deeganka oo la hadlay warbaahinta maxaliga ayaa u sheegay in ay arkayeen qaar ka mid ah Ciidamada Puntland oo Madaafiic iyo hubka culus ku ridaya qararka ku hareereysan Suuj.

Ciidamada Puntland ayaa gacanta ku dhigay xubno ka tirsan Al-shabaab kuwaas oo isku dayey in ay ka baxsadaan toga Suuj waxaana sidoo kale la qabtay mid ka mid ah ciidanka Al-shabaab oo isaga oo habow ah ay qabteen dadka reer baadiyaha ah.

Warar aan ka helnay ilo lagu kalsoon yahay ayaa sheegay in Togga Suuj lagu qabtay nin oday ah oo asal ahaan ka soo jeeda degmada Eyl magaciisana waxaa lagu sheegay Buruuj oo isaga iyo wiil uu dhalay ay ka mid ahaayeen dadka ka soo jeeda deegaanka Eyl ee ku biiray Al-shabaab kana mid ahaa ciidankii galay Togga Suuj.

M_M Deeq
Halgan.net