Afhayeenka Maamulka J/land oo sheegay in hub loo soo waday Kismaayo lagu qabtay Afgooye

Kismaayo:-Afhayeenka Maamulka Jubaland C/naasir Seeraar Maax ayaa sheegay in hub loo soo waday magaalada Kismaayo ee xarunta gobalka J/hoose  lagu qabtay Gobolka Shabellaha Hoose gaar ahaan Degmada Afgooye.

C/naasir Seeraar Maax oo la hadlay warbaahinta ka howlgasha magaalada Muqdisho ayaa sheegay in gaari xamuul ah oo hub ku raran yahay ay ciidamada AMISOM ku qabteen Degmada Afgooye waxaana uu ku eedeeyey madaxda DFS in ay hubka u soo wadeen magaalada Kismaayo.

Afhayeenka Maamulka Jubaland C/naasir Seeraar Maax ayaa waxaa uu si gaar ah ugu eedeeyey in hubka uu soo diray wasiirka arrimaha gudaha ee DFS C/kariin Xuseen Guuleed

Maamulka Jubaland ayaa dhowr mar oo hore waxay ku eedeeyeen masuuliinta DFS in ay hub iyo ciidan soo galiyeen magaalada Kismaayo si ay u fashiliyaan Maamulka Jubland ee dhawaan lagu dhisay magaalada Kismaayo.

Warar madax banaan oo ay heshay Halgan.net ayaa sheegaya in gaari waday hub ay saaka ciidamada AMISOM ku qabteen deegaanka No:50 balse ilaa haatan lama oga cida hubkaas uu ku socday mana jiraan wax war ah oo ka soo baxay DFS.

Afhayeenka Maamulka Jubaland C/naasir Seeraar Maax ayaa ugu danbeyn waxaa uu sheegay in Maamulka J/land ay fashiliyeen shirqool lala damacsanaa wuxuuna eedeeyey wafdiga DFS ay u soo dirtay magaalada Kismaayo.

Cabdi Yare
Kismaayo