Dibadbax looga soo horjeedo Koonfur Afrika oo ka dhacay Baladweyne iyo Guriceel

Hiiraan:-Banaanbax ballaaran oo looga soo horjeedo tacdiyada lagu hayo dadka Soomaaliyeed ee ku dhaqan dalka Koonfur Afrika ayaa waxaa uu ka kala dhacay magaalooyinka Guriceel iyo Beledweyne waxaana dad weynaha dhigayey Dibad-bax ay ku qeylinayeen erayo lid ku ah dowlada Koonfur Afrika .

Magaalooyinka dalka Koonfur Afrika ayaa noqday kawaan lagu qasho dadka Soomaaliyeed ee qaxa ku tagay dalkaas ka dib markii ay ka soo barakaceen dagaalo iyo dhibaatooyin ka jira dalkooda  waxaana ilaa haatan lagu dilay dalka Koonfur Afrika Soomaali gaareysa boqolaal kuwaas oo loo dilay si aad u foolxun.

Banaanbax ka dhacay magaalooyinka Baladweyne iyo Guriceel ayaa waxaa ay shacabka ku muujiyeen sida ay uga xun yihiin tacdiga iyo dilalka joogtada ah ee loo geysanayo shacabka Soomaaliyeed waxaana ay ugu baaqeen masuuliinta DFS in ay arinkaas wax ka qabtaan lana soo laabtaan safiirka halkaas u jooga dowlada Soomaaliya.

Dibad-baxyo ballaaran oo la mid ah midka ka dhacay magaalooyinka Baladweyne iyo Guriceel ayaa waxaa uu horay uga dhacay magaalooyinka Garoowe, Buuhoodle, Muqdisho ,London iyo Minisota waxaana wili socda Banaanbaxyada ay dhigayaan shacabka Soomaaliyeed ee ku dhaqan dalka gudahiisa iyo dibadiisa.

C/Casiis Maxamed
Halgan.net