Meydka haweeney laga helay Koonfurta magaalada Gaalkacyo ee xarunta gobalka Mudug

Gaalkacyo:-Wararka saaka naga soo gaaraya magaalada Gaalkacyo ee xarunta gobalka Mudug ayaa sheegaya in Meydka qof haweeney ah oo lagu dilay rasaas laga helay duleedka magaalada Gaalkacyo ee xarunta gobolka Mudug.

Saraakiisha Booliska ee Maamulka Galmudug ayaa sheegay in Gabadha oo lagu magacaabo Fardowsa Salaad  da’deeda lagu qiyaasay 22 jir xalay lagu dilay Koonfurta Gaalkacyo waxaana ay sheegeen in ay wadaan baaritaano.

Taliyaha qeybta Booliska gobolka Mudug ee maamulka Galmudug Maxamed Nuur Cali (Gadaar) ayaa  warbaahinta u xaqiijiyey dilka foosha xun ee lagu kacay qof haweeney ah wuxuuna sheegay in falkaan uu yahay mid ku cusub deegaanada Galmudug.

Saraakiisha caafimaadka ee isbitaalka Gaalkacyo ee la geeyay meydka gabadha ayaa warbaahinta u sheegay in gabadha la kufsaday inta aan la dilin ka hor waxayna ugu baaqeen laamaha amaanka in falkan foosha xun cida geysatay la mariyo ciqaabkeeda.

Magaalada Gaalkacyo ee xarunta gobalka Mudug ayaa waxaa falal foolxun ka geystay burcad badeed  kuwaas oo ilaa haatan ay waxba ka qaban waayeen labada Maamul ee Galmudug iyo Puntland.

Shacabka ku dhaqan magaalada Gaalkacyo ayaa aad uga xumaaday falkan foosha xun ee loo geystay alaha u naxariistee Fardowsa Salaad .

M_M Deeq
Halgan.net