Xildhibaano ka tirsan Dowllada Federaalka Soomaaliya oo gaaray Degmada Cadaado

Muqdisho:Wararka naga soo gaaraya magaalada Muqdisho ayaa sheegaya in siyaasiyiin iyo Xildhibaano ka tirsan golaha baarlamaanka DFS oo ay isku heyb yihiin Sh.Xassan Daahir Aweys ay saaka u baqooleen magaalada Cadaado ee xarunta Maamulka Ximin iyo Xeeb.

Ilo wareed ku sugan magaalada Muqdisho ayaa u sheegay Halgan.net in xildhibaano ka soo jeeda gobalka Mudug iyo Galgaduud ay u baqooleen magaalada Cadaado waxaana socdaalkooda ku weheliya Yuusuf Maxamed Siyaad (Indha-Cadde) oo ka tirsanaa Xisbul Islaam  balse markii danbe ku biiray dowladii uu madaxada uu ka ahaa Sheekh Shariif Sheekh Axmed.

Afhayeenka Maamulka Ximin iyo Xeeb Maxamed Cumar Hagafey ayaa warbaahinta u sheegay goordhow in ujeeddada socdaalka wafdiga ka kooban xildhibaano iyo masuuliin kale ay ku tageen magaalada Cadaado uu yahay  in laga  wada-hadallo xaaladda Xasan Daahir Aweys iyo cidda ay ku wareejin lahaayeen Maamulka Ximin iyo Xeeb .

Waxaa jira warar aan wili la xaqiijin oo sheegay in Madax ka tirsan DFS ay ka codsatay Sh. Xassan Daahir Aweys in uu yimaado magaalada Muqdisho balse uu wili ka caga jiidayo Sheekh Xasan Daahir Aweys iyo saraakiisha la socota. Shacabka Soomaaliyeed ayaa waxay wada dhowrayaan mowqifka uu qaadan doono Sheekh Xasan Daahir Aweys ka dib markii shirqool lagu dilay saraakiil sare oo ka tirsan Al-Shabaab qaarka la dhigay Xabsiyo qarsoodi ah

A/Cawale
Halgan.net