Al-Shabaab iyo sarkaal ka tirsan Dooxada Shabelle oo guulo sheegtay dagaalka ka socda B/weyne

Hiiraan:-Afhayeenka  Ciidamada  Alshabaab Sheekh C/casiis  Abuu Muscab ayaa  ka warbixiyay dagaalkii saakay ka dhacay magaalada  Baladweyne ee xarunta gobalka Hiiraan waxaana uu sheegay in ciidamada Al-Shabaab ay 3 mar jabiyeen ciidamadii huwanta ahayd ee saaka sooo weeraray magaalada Baladweyne

Sheekh Abuu  Muscab ayaa waxaa uu sheegay in ciidamo itoobiyaan ah iyo kuwa Soomaali ah ay soo weerareen saaka magaalada B/weyne waxayna ciidamada Itoobiya ku hubeysnaayeen gawaari badan oo tikniko wuxuuna cadeeyey in ay 3 goor jabsheen ciidamada soo weeraray B/weyne markii danbana ay si xeeladeysan difaacyada hore uga soo gurteen ciidamada al-Shabaab iyaga oo aan waxba soo gaarin.

Afhayeenka  Ciidamada  Alshabaab Sheekh C/casiis  Abuu Muscab ayaa sidoo kale ku qiyaasay ciidamada Itoobiyaanka ee soo weeararay magaalada B/weyne in ay gaarayeen ilaa 3000. oo askari ayna wateen ilaa 40 gaari uural ah.

Sheekh Abuu Muscab ayaa amaanay sida ciidamada Al-Shabaab ay iska difaaceen ciidamada huwanta ah wuxuuna sheegay in dagaalka uu wili u socdo si goosgoos ah gudaha magaalada.

Dhanka kale Sarkaal u hadlay  Maamulka Dooxada Shabelle oo la yiraahdo Max’ed Nuur Cagojoof ayaa dagaalada B/weyne guul ka sheegatay wuxuuna sheegay in ay magaalada oo dhan ay gacanta ku hayaan Al-Shabaabna ay ka saareen .

A/Cawale
Halgan.net