Dagaal culus oo dhexmaray ciidamada DFKM kuwa AMISOM iyo ururka Al-shabaab

Muqdisho:-Dagaal culus oo saaka ka qaraxay waqooyiga magaalada Muqdisho ka dib markii ay weerar qorsheysan ay ciidanka Al-shabaab ku qaadeen degmooyinka Kaaraan, Heliwaa iyo qeybo ka mid ah Yaaqshiid oo ay ku sugan yihiin ciidanka DFKM iyo kuwa AMISOM.

Dagaalka oo ahaa mid culus ayaa waxaa la isku adeegsaday hubka noocyadiisa kala duwan waxaana magaalada Muqdisho laga maqlayaa Madaafiicda iyo BMka ay ridayaan ciidamada AMISOM kuwaas oo ku dhacaya goobo ka baxsan halka uu dagaalka ka socdo.

Sarkaal ka tirsan ciidamada DFKM oo lagu magacaabo Col Aden Xasan ayaa sheegay in ay jebiyeen ciidamada Al-Shabaab askarna ay ka dileen .

Dhanka kale Afhayeenka ciidamada Ururka Al-Shabaab C/casiis abu Muscab ayaa sheegay in ay jab weyn u geysteen ciidamada DFKM iyo kuwa AMISOM waxaana uu sheegay in ay dileen 13-askari oo ay ku jiraan afar ka mid ah ciidamada AMISOM.

A/Cawale
Halgan.net