Ciidamo Itoobiyaan ah oo gaaray degmada Dhuusomareeb ee xarunta gobolka Galguduud

Guriceel:-Ciidamo Itoobiyaan ah oo dhawaan ku biiray ciidanka AMISOM ayaa xalay gaaray degmada Dhuusomareeb ee xarunta gobolka Gal-guduud waxaana ay xarumo ka sameysteen gudaha degmada iyo duleedkeeda .Ciidamada gaaray xalay degmada Dhuuso mareeb ayaa waxay kulamo kala duwan la qaateen Ahlusuna (Suufiyada) waxayna ka wada hadleen qaabkii ururka Al-shabaab looga saari lahaa deegaanada ay kaga sugan yihiin gobalka Galgaduud.

Ciidamada Itoobiya ee qaybta ka ah AMISOM ayaa waxay horey u soo mareen degmada Guriceel ee gobolka Gal- gaduud, halkaas oo kulamo kala duwan ay la soo qaateen. Ra’iisul wasaaraha Itoobiya Hailemariam Desalegn oo shalay shir jaraa,id ku qabtay magaalada Adis Ababa ayaa sheegay in Al-shabaab ay meel walba kula dagaalami doonaan .

Ra’iisul wasaaraha dalka Itoobiya Hailemariam Desalegn ayaa sheegay in dowladdiisa ay aad ugu faraxsan tahay in ciidamadooda ay ku biiraan ciidamada Midowga Afrika ee AMISOM kuwaas oo ka wada Soomaaliya howlgalo ay ku taageerayaan dowladda federaalka ee Soomaaliya.

A/Cawale
Halgan.net