Dablay weerar ka geystay Waqooyiga magaalada Gaalkacyo oo la qabtay.[Dhagayso]

Gaalkacyo:-Koox hubeysan oo wajiga soo duubtay ayaa waxaa ay rasaas huwiyeen caawa dad rayid ah oo ku sugnaa Makhaayada ku taal xaafadda Garsoor ee magaalada Gaalkacyo ee xarunta Gobolka Mudug. Weerarka ay geysteen kooxdaan hubaysan ayaa waxaa ay dhaawaceen ilaa 4 qof oo rayid ah balse nin rayid ah oo ku soo baxay markii uu weerarku socday kuna hubaysanaa qoriga Ak-47 ayaa tacshiirad ooda uga qaaday waxaan uu dhaawacay kooxdii weerarka soo qaaday mid ka mid ah oo markii danbe ay dadku cayrsadeen balse ay u suurto gashay in ay u gudbeen xaafadda Baraxley oo ay maamulaan maamulka Gal-Mudug.

Kooxda weerarka fulisay oo wajiga soo duubtay ayaa wararka naga soo gaarayo magaalada Gaalkacyo waxaa ay sheegayaan in la aqoonsaday , maamulka Gal-Mudug ayaa sheegay in ay qabteen mid ka mid ah raggii weerarka ka geystay Xaafadda Baraxley oo hadda lagu daweynayo Koonfurta Gaalkacyo.

Gudoomiyaha Degmada Gaalkacyo Col.Axmed Cali Salaad oo caawa ka hadley weerarka ay kooxdaan hubaysan ay ku qaadeen Makhaayada ku taal Xaafadda Garsoor ayaa waxaa uu sheegay in mid ka mid ah raggii weerarka ka geystay Waqooyiga Gaalkacyo ay qabteen Booliska Gal-Mudug  ka dib markii ay xiriir la sameeyeen laamaha amaanka ee Puntland.

Gudoomiyaha Degmada Gaalkacyo Col.Axmed Cali Salaad ayaa ugu baaqay dadka shacabka ku dhaqan Gaalkacyo oo haldoorkoodii la laayo mar walba in qofkii ay arkaan isagoo dil ama qarax geysanaya ay meeshiisa ku dilaan wixii arrinkaas ka yimaadan ay dowllada Puntland ay damaano qaadayso.

Hoos Ka Dhagayso  Waraysiga Gudoomiyaha Degmada Gaalkacyo Col.Axmed Cali Salaad

Halgan.net/ RadioGaalkacyo