Golaha Wasiiradda Puntland oo ka shiray amniga iyo horumarinta[Cod/masawiro]

Garoowe:-Golaha wasiiradda Puntland ayaa Madaxtooyada magaalada Garowe ku yeeshay shirkoodi todobaadlaha ahaa, waxaana shir gudoominayay madaxweynaha dowladda Puntland Mudane Dr. Cabdiweli Maxamed Cali Gaas. In ka badan 40 xubnood ayaa soo xaadirtay kulankan uu joogay sidoo kale Madaxweyne ku xigeenka Cabdixakiim Cabdulaahi Cumar, waxana markii uu soo idlaaday saxaafadda hadal kooban siiyay agaasimaha guud ee Madax tooyadda Dr. Deeq Saleebaan Yusuf.

Agaasimaha ayaa sheegay in goluhu warbixin ka dhageystay wasiirka amniga taasi oo ku saabsanayd Nabadgelyada guud ee dalka iyo baahida loo qabo inay wada shaqeeyaan laamaha amaanka iyo dadweynuhu.Wasaaradda Gadiidka iyo hawlaha guud oo soo gudbisay xeerka Xamuulka ayaa wasiiradu ka doodeen, sidoo kalena waxa la isla qaatay diiwaangelinta gaadiidka dowladda iyo diwaangelinta wadayaasha (Dareewaladda) si loo dhawro hantida dowladeed.

Waxa Goluhu isla meel dhigay qodob horey uu soo jeedshay madaxweynaha Puntland oo ahaa in la diiwaangasho hantida gaarka ee uu leeyahay masuulka dowladeed si ay qayb uga noqoto la-dagaalanka musuq-maasuqa.

Buundada Sunijiif oo dhowaanahan jabneyd ayaa Madaxweynuhu dhagax dhigi doona si loo bilaabo hawsha dib u dhiskeeda. Waxana dib loo furey mashaariicdii Puntland ka socday sida JPLG iyadoo xukuumadda fasaxday bixinta qoondeynta 10% ee ku soo aadantay.

no images were found

Ugu danbeyntii ayaa agaasimaha guud uu sheegay in wafdi uu horkacayo madaxweynaha Puntland ay maalinka beri ah u bixi doonaan dhanka degmada Dangorayo ee gobolka Nugaal halkaasi oo qoysaskii duufaantu wax yeeshay loogu qaybin doono mucaawino ka timid dalka Turkiga.

Hoos ka Dhagayso Agaasimaha guud ee Madaxtooyadda Dr.Deeq Saleebaan Yusuf oo la hadlay saxaafadda

-Dhamaad-

Xafiiska madaxwaynaha Puntland.
Halgan.net, Garoowe