Raisulwasaaraha DFS oo cambaareeyey qaraxii ka dhacay garoonka Diyaaradaha Muqdisho

Muqdisho:-Ra’iisul Wasaaraha Xukuumada Federaalka Soomaaliya ayaa si adag u cambaareeyey galabta ka hor inta aanu ka dhoofin dalka falkii qaraxa ahaa ee kooxaha nabadiidku ay ka fuliyeen nawaaxiga garoonka caalamiga ah ee Aadan-cadde, kaasoo ay ku dhinteen dad rayidka ah oo ku ganacsanayay afaafka hore ee garoonka.

Ra’iisul Wasaaraha ayaa tacsi u diray dhamaamba dadkii ku geeriyooday goobtaasi qaraxa, wuxuuna u rajeeyey inuu eebbe Janada geeyo, maadaama ay yihiin dad si xaq darro ah lagu xasuuqay, wuxuuna dhanka kale caafimaad u rajeeyey dadkii kale ee ku dhaawacmay falkaasi.

“Falkan wuxuu cadeyn u yahay sida ay weli ugu ooman yihiin kooxaha nabadiidku daadinta dhiiga dadka Shacabka ah, waana in bulshada Soomaaliyeed ay garab ku siiyaan dawladda ciribtirka kooxahan xagjirka ah ee baneystay nafta, maalka iyo sharafka ummadda” ayuu yiri Ra’iisul wasaaraha Xukuumada ka hor inta aanu ka dhoofin garoonka Muqdisho xilli uu ku sii jeeday dalka Itoobiya.

Garad Salad Hersi
Senior Press officer, PM office
Mogadishu, Somalia