Soomaali loo soo carbiyey la dagaalanka diinta ee badali doonta Al-shabaab! W/Q Sh. Axmed Cabdisamad

Bakayle intuu bur ku jiro ayuu bur kale sii daydaydaa, cadowga islaamkuna inta ay hub ama qorshe kugu la dirirayaan waxay sii diyaarsanayaan hub iyo qorshe ay kaas ku badashaan; waayo xeeladdii ama qalabkii muddo la isticmaalo waa lagula baranayaa.

Dhawr iyo afartankii sano ee la soo dhaafay cadowga islaamku wuxuu inagu la diriray hub kala jaad ah iyo qorsheyaal kala duwan, sida: hantiwadaagga Cilmiga ku dhisan, colaad sokeeye iyo qabqable, kooxda Alshabaab ee magaca diinta huwan oo aan waxba inoo reebin.

Intii aynu ku mashquulsanayn sidaynu mawjadahaas ka yeeli lahayna waxaa cadawga islaamku wadey inuu la dagaalanka diinta iyo ehelkeeda u diyaarsado dad ina ka dhashay oo ina la af iyo midab ah, kuwaas oo buuxin kara kaalinta ay Alshabaab banaynayso.

Al-shabaab dadka waxay ku dirtay diinta iyo dadkii ku baaqayeyba, ciidamada cusub ee cadowgu soo diyaarsadayna dadka ayay diinta ku dirayaan iyaga oo maraya dariiq ka duwan waddadii Al-shabaab martay.

Tusaale ahaan: Al-shabaab dadka intay dilaan ama dhacaan ama ihaaneeyaan ayay ku lahaayeen waxaa ku dilay Ilaahay ama rasuulka ama diinta laakiin kuwaani nusuustii diinta iyo axkaamteedii ayay mid mid u inkirayaan ama u durayaan iyaga oo dadweynaha uga dhigaya in aysan diinta kasoo horjeedin ee ay difaacayaan.

W/Q Sh. Axmed Cabdisamad